علي عبدالله الربعي
يا فقير ابن الفقير
شيل خلقانك وطير
البلد صارت لغيرك
للمنافق والأجير
***
دير بالك لا تكلّم
لا تحرك... لا تنسّم
صير اصمخ صير اطرم
وبالنصيحة لا تشير
***
ولا تـــــقــــــــول الارض أرضـــــــي
والذهب والنفط نفطي
صير هتلي صير عفطي
تحضى بالخير الكثير
***
ما يعيش إلا المنافق
في بلادك والمراوغ
أنا أعطيك الحقايق
عن مرضنا هالخطير
***
المثقف... جمدوه
والمرائي... ارفعوه
للمناصب... مسّكوه
وكل ما يبغى يصير
***
هذه حالتنا بوطّنا
بعضنا ياكل بعضنا
والحكومة في بلدنا
للغني دايم نصير
Subscribe to:
Posts (Atom)
